Washington (Adduun.com) – Saddex askari oo Mareykan ah ayaa ku dhintay dagaalka Iran, halka shan kale ay soo gaareen dhaawacyo culus, sida lagu sheegay bayaan Axaddii kasoo baxay Taliska Dhexe ee Ciidamada Mareykanka (CENTCOM).
CENTCOM ayaa sheegay in ilaa 9:30 subaxnimo waqtiga Bariga Mareykanka (ET), saddexda askari ay ku dhinteen dagaalka intii ay socotay howl-galka uu talisku ugu yeeray “Operation Epic Fury,” iyadoo howl-gallada waaweyn ay weli socdaan.
Taliska ayaa sidoo kale sheegay in askar kale ay qabaan dhaawacyo fudud, oo ay ku jiraan dhaawacyo ka dhashay firirka walxaha qarxa iyo miyir-beel, kuwaas oo la filayo in dib loogu celiyo shaqada marka xaaladdooda la qiimeeyo.
CENTCOM waxay caddeysay in magacyada askarta geeriyootay aan la shaacin doonin illaa ugu yaraan 24 saacadood, si marka hore qoysaskooda si rasmi ah loogu wargeliyo, sida uu dhigayo nidaamka milatariga Mareykanka.
Wararkani waxay ka dhigan yihiin khasaaraha ugu horreeya ee rasmi ah ee ciidamada Mareykanka tan iyo markii duqeymaha tooska ah ee Mareykanka iyo Israa’iil ay billowdeen Sabtidii.
Sida ay sheegtay CENTCOM, howl-galkan militari ayaa la bilaabay 28-ka Febraayo 2026, iyadoo duqeymaha ugu horreeya ay bilowdeen 1:15 subaxnimo waqtiga ET ee Mareykanka.
Talisku wuxuu sheegay in bartilmaameedyada la weeraray ay ka mid ahaayeen xarumaha taliska iyo kantaroolka ee Ilaalada Kacaanka Iran (IRGC), difaacyada cirka, goobaha gantaallada iyo drones-ka laga rido, iyo saldhigyada ciidamada cirka.
Markii uu ku dhawaaqayay howl-galka, Madaxweynaha Mareykanka Donald Trump ayaa hore uga digay in dagaalku sababi karo dhimasho iyo dhaawac soo gaara ciidamada Mareykanka, isagoo sheegay in khasaaro uu ka mid yahay waxyaabaha laga filan karo dagaal kasta.
Dhanka kale, xiisadda gobolka ayaa sii xoogeysaneysa. Wararka kasoo baxaya dhinacyada is haya ayaa muujinaya in ay jiraan weerarro iyo weerar-celin isdaba joog ah, iyadoo weli ay socoto qiimeynta khasaaraha dagaalka.
Saameynta colaaddan ayaa sidoo kale gaartay ganacsiga iyo isu socodka gobolka Khaliijka, waxaana jira warar sheegaya carqalado ku yimid duulimaadyo, dekedo iyo dhaqdhaqaaqyada maraakiibta shidaalka, xilli walaac laga muujinayo amniga marinka Hormuz.
Howl-galka ayaa weli socda, waxaana la filayaa in saacadaha iyo maalmaha soo socda ay soo baxaan faahfaahin dheeraad ah oo ku saabsan halka khasaarahan ka dhacay iyo nooca weerarka sababay dhimashada askarta Mareykanka.
