Jabuuti (Adduun.com) – Dowladda Jabuuti ayaa xoojinaysa nidaamka qaran ee ka hortagga lacag-dhaqidda iyo maalgelinta argagixisada, iyadoo Khamiistii Ra’iisul Wasaaraha Jabuuti, Cabdulqaadir Kaamil Maxamed uu shir guddoomiyay kulan lagu lafaguray dib-u-habaynta istiraatiijiga ah ee nidaamkan.
Kulanka oo ka qeyb-galeen xubnaha guddiga isku-xirka qaranka ee qaabilsan dejinta iyo hagidda siyaasadaha ka hortagga lacag-dhaqidda iyo maalgelinta argagixisada, ayaa sidoo kale waxaa goobjoog ahaa wasiirro, xoghayaha guud iyo madaxa xafiiska ra’iisul Wasaaraha, agaasimaha guud ee hay’adda qaranka ee macluumaadka maaliyadeed iyo saraakiil kale oo ka tirsan hay’addaas.
Intii shirka socday, guddiga ayaa la hordhigay warbixin faahfaahsan oo ku saabsan horumarka ay hay’addu ku tallaabsatay tan iyo aasaaskeeda.
Warbixinta ayaa iftiimisay hirgelinta hannaan casri ah oo lagu maareeyo xogta maaliyadeed, kobcinta wada-shaqeynta hay’adaha dowladda, iyo doorka ay hay’addu ku leedahay qiimeynta wadajirka ah ee uu hoggaaminayo GAFIMOAN, oo ah urur goboleed la shaqeeya hay’adda caalamiga ah ee FATF.
Gunaanadka wada-hadallada kadib, Ra’iisul Wasaaruhu wuxuu meel-mariyay miisaaniyadda hay’adda qaranka ee macluumaadka maaliyadeed ee sanadka 2026, taas oo u oggolaanaysa hay’adda inay yeelato madax-bannaani dhaqaale si loo kordhiyo hufnaanta iyo wax-ku-oolnimada shaqadeeda.
Lama shaacin faah-faahin dheeraad ah oo ku saabsan qaddarka miisaaniyadda la ansixiyay.
Bayaan rasmi ah oo ka soo baxay xafiiska ra’iisul wasaaraha ayaa lagu sheegay in tallaabadan looga dan leeyahay xoojinta u hoggaansanaanta Jabuuti ee heerarka caalamiga ah ee la-dagaallanka lacag-dhaqidda iyo maalgelinta argagixisada, isla markaana lagu dhisayo kalsooni dheeraad ah oo ku saabsan nidaamka maaliyadeed ee dalka.
Xukuumadda Jabuuti ayaa mar kale adkeysay sida ay uga go’an tahay taageeridda casriyeynta hay’adaha ka shaqeeya arrimahan muhiimka ah, si Jabuuti ay u noqoto xarun maaliyadeed oo ammaan ah, sharciyeysan, isla markaana la jaanqaadda hab-raacyada ugu sarreeya ee caalamiga ah.
