Maxaa kasoo baxay kulankii Xasan iyo Golaha Mustaqbalka?

Muqdisho (Adduun.com) – Waxaa goordhow hoteelka Decale ee magaalada Muqdisho kusoo gabagaboobmay kulan qado sharaf ah oo u dhexeeyay madaxweynaha Soomaaliya Xasan Sheekh Maxamuud iyo Golaha Mustaqbalka oo la filayo in wada-hadallo ay dhawaan uga bilowdaan gudaha caasimada.

Kulankan ayaa ahaa mid hordhac ah oo dhinacyadu isaga xog wareysteen xaaladda guud, si loo muujiyo niyad wanaag, si uu u guuleysto shirkooda.

Sidoo kale, waxaa lasoo wariyay in madaxdan oo ay ku jireen Axmed Madoobe iyo Saciid Den ay yeesheen kulamo gaar ah oo looga hadlay khilaafka dhex-dooda, iyo arrimo ku aadan wada-hadallada bilaabanaya ee labada dhinac.

Xildhibaan Cabdullahi Carab oo kamid ah xubnaha mucaaradka ee kulanka ka qayb-galay ayaa sheegay in madasha laga jeediyay hadallo kooban oo soo dhaweyn ah, isla markaana dhinacyadu ay muujiyeen niyad wanaag guud.

“Waxaan kasoo qayb-galnay annagoo ah Golaha Mustaqalka qado sharaf uu sameeyay madaxweynaha JFS Mudane Xasan Sheekh Maxamuud maanta waxay ahayd uun shirka furitaankiisa khudbado gaagaaban ayaa meesha laga akhriyay oo isugu jiray soo dhaweyn iyo mahad-celin” ayuu yiri Cabdullahi Carab.

Sidoo kale, wuxuu hoosta ka xariiqay in shirarku sii socon doonaan, kadibna la’isugu imaan gogosha oo lagu dhammeyn doono wax kasta oo tabasho ah.